Home Lotaya မီးဖွားပြီးနောက်တစ်လအတွင်း စားသုံးသင့်တဲ့အစားအစာများ

မီးဖွားပြီးနောက်တစ်လအတွင်း စားသုံးသင့်တဲ့အစားအစာများ

0
1176

မီးဖွားပြီးချိန်က ချစ်မေမေတို့အတွက် အပင်ပန်းဆုံးအချိန်တွေထဲကတစ်ခုဖြစ်ပြီး ချစ်ရတဲ့သားသမီးရတနာလေးတွေကို တန်ဖိုးဖြတ်မရတဲ့နို့ချိုအေးအေးတိုက်ကျွေးရင်းနဲ့လည်း အားအင်တွေကုန်ခမ်းတတ်ပါတယ်။ သားသားမီးမီးတို့ အချိန်မတော်ကြီးထငိုတာကြောင့် အိပ်ရေးပျက်ရတဲ့ညပေါင်းများစွာကိုလည်း ရင်ဆိုင်ရမှာဖြစ်ပြီး သူတို့လေးတွေရဲ့ ကျန်းမာရေးနဲ့ ဝေယျဝစ္စကိစ္စတွေနဲ့လည်း လုံးပမ်းနေရမှာဖြစ်တာကြောင့် မီးဖွားပြီးတဲ့တစ်လအတွင်းမှာ ဘယ်လိုအစားအစာတွေကို စားသောက်သင့်သလဲဆိုတာကို ချစ်မေမေတို့အတွက် မျှဝေပေးလိုက်ပါတယ်။

၁။ ကွေကာအုပ်

ကွေကာအုပ်မှာ အမျှင်ဓာတ်နဲ့ပရိုတိန်းဓာတ်ကြွယ်ဝစွာပါဝင်တာကြောင့် ချစ်မေမေတို့အတွက် ကုန်ခမ်းသွားတဲ့ အားအင်တွေကို ပြန်လည်ဖြည့်တင်းပေးနိုင်ပါတယ်။ ဒါ့အပြင် ကွေကာအုပ်က နို့ထွက်နှုန်းကိုလည်း တိုးတက်စေတာကြောင့် နို့တိုက်နေချိန်အတွက် အသင့်တော်ဆုံးအစားအစာတစ်မျိုးလည်းဖြစ်ပါတယ်။

၂။ အခွံမာသီး

အခွံမာသီးတွေမှာ ပရိုတိန်းဓာတ်တွေပါဝင်တာကြောင့် ခွန်အားဖြည့်တင်းဖို့ အကောင်းဆုံးအစားအစာတစ်ခုလည်းဖြစ်ပါတယ်။ အခွံမာသီးကတစ်ဆင့် ရရှိတဲ့ အဆီတွေက သားသားမီးမီးလေးတို့ရဲ့ ခန္ဓာကိုယ်အစိတ်အပိုင်းတွေနဲ့ ဉာဏ်ရည်ဖွံ့ဖြိုးတိုးတက်မှုတွေအတွက် အင်မတန်အရေးပါပြီး ချစ်မေမေတို့ရဲ့ ခန္ဓာကိုယ်က ဇီဝဆိုင်ရာဖြစ်ပျက်မှုနဲ့ နို့ထုတ်လုပ်နှုန်းတို့အတွက်လည်း အလွန်အသုံးဝင်တဲ့အစားအစာဖြစ်ပါတယ်။

၃။ ထောပတ်မြေပဲ

ထောပတ်မြေပဲအပြင် ဗာဒံအဆီနဲ့ပြုလုပ်ထားတဲ့ထောပတ် ဒါမှမဟုတ် အခြားသောအခွံမာသီးတစ်မျိုးမျိုးနဲ့ ပြုလုပ်ထားတဲ့ ထောပတ်တို့ကိုလည်း စားသုံးပေးသင့်ပါတယ်။ အဲ့ဒီအရာတွေမှာ ပရိုတိန်းဓာတ်အပြင် ခန္ဓာကိုယ်အတွက် ကျန်းမာစေတဲ့ အဆီတွေကို ပေးစွမ်းနိင်ပါတယ်။ ကိုယ်စားမယ့် ကွတ်ကီး၊ ဘီစကစ် ဒါမှမဟုတ် ပေါင်မုန့်တစ်ချပ်ပေါ်မှာ ဒီထောပတ်အမျိုးအစားတွေကို ဇွန်းတစ်ဇွန်းစာ ပမာဏသုတ်ပြီး စားသုံးပေးသင့်ပါတယ်။

၄။ ပေါင်မုန့်ကြမ်း

အများစုကတော့ နူးညံ့ချောအိနေတဲ့ပေါင်မုန့်တွေကိုပဲ နှစ်သက်ကြပေမယ့် ဒီပေါင်မုန့်ကြမ်းကလည်း ခန္ဓာကိုယ်အတွက်လိုအပ်တဲ့ ပရိုတိန်းဓာတ်တွေ၊ အမျှင်ဓာတ်တွေကို ဖြည့်ဆည်းပေးနိုင်တာကြောင့် ဘယ်အချိန်မှာပဲဖြစ်ဖြစ် စားသုံးပေးသင့်တဲ့အစားအစာတစ်မျိုးဖြစ်ပါတယ်။

၅။ ဒိန်ချဉ်

ဒိန်ချဉ်ကလည်း မီးဖွားပြီးတစ်လအတွင်းမှာ မဖြစ်မနေ စားသုံးပေးသင့်တဲ့အစားအစာဖြစ်ပြီး စားလို့ရတဲ့အစေ့အဆံတစ်ခုခု ဒါမှမဟုတ် အသီးတစ်မျိုးမျိုးကိုရောထည့်ရင်း အာဟာရဓာတ်တွေပိုမိုရရှိအောင် စားသုံးလို့ရပါတယ်။ ဒါပေမယ့် သကြားအပိုတွေထပ်ထည့်တာကိုတော့ မဖြစ်မနေရှောင်ရှားသင့်ပါတယ်။

၆။ ဥများ

ဘာတွေပဲဖြစ်ဖြစ် ဥအမျိုးမျိုးကတော့ အာဟာရဖြစ်ဖို့ အလွယ်ကူဆုံးနဲ့ အမြန်ဆန်ဆုံးအစားအစာတစ်မျိုးပါပဲ။ အချိန်တိုတိုနဲ့ပြုတ်စားလို့ရသလို ကြော်စားလို့လည်းရပြီး ပရိုတိန်းဓာတ်တွေအပြင် မီးဖွားပြီးနောက်ပိုင်း လိုအပ်တဲ့ ဗီတာမင်နဲ့အာဟာရဓာတ်အားလုံးကို ပေးစွမ်းနိုင်တဲ့အစားအစာလည်းဖြစ်ပါတယ်။

၇။ အာလူး

အာလူးမှာပါဝင်တဲ့ ဗီတာမင်အေက နို့ထွက်နှုန်းကို မြင့်မားစေပြီး ဟင်းသီးဟင်းရွက်တွေထက်လည်း ချက်ရပြုတ်ရ ပိုမိုလွယ်ကူစေပါတယ်။ ဒါ့အပြင် အာလူးက မီးဖွားပြီး ကိုယ်ခံအားနည်းနေနိုင်တဲ့ ချစ်မေမေတို့အတွက်လည်း ကိုယ်ခံအား အမြန်ဆုံးကောင်းမွန်လာအောင် စွမ်းဆောင်ပေးနိုင်ပါတယ်။

၈။ ပန်းသီး

ပန်းသီးမှာလည်း အာဟာရဓာတ်မျိုးစုံပါဝင်ပြီး ကျန်းမာရေးအတွက် အထောက်အကူဖြစ်စေတဲ့ အဆီဓာတ်တွေပါဝင်တဲ့အပြင် ခန္ဓာကိုယ်အတွက် လိုအပ်တဲ့ခွန်အားတွေကိုလည်း လွယ်လွယ်ကူကူနဲ့ပေးစွမ်းနိုင်ပါတယ်။

၉။ ပဲစည်သွပ်ဘူး

စည်သွပ်ဘူးထဲကဆိုပေမယ့် ဒီပဲမှာ ဘာဓာတုဆေးဝါးမှမပါဝင်တဲ့အပြင် အမျှင်ဓာတ်မြင့်မားစွာပါဝင်သလို အစာချေစနစ်ကို တိုးတက်ကောင်းမွန်စေနိုင်ပါတယ်။ ဒါ့အပြင် မီးနေသည်ကာလအတွင်းမှာလည်း ပရိုတိန်းဓာတ်တွေအပြည့်အဝပေးစွမ်းနိုင်ပြီး ဘယ်လိုအစားအစာမျိုးမှာမဆို ထည့်သွင်းစားသောက်လို့ သင့်တော်တဲ့ အစားအစာတစ်မျိုးလည်းဖြစ်ပါတယ်။

#HM

#ChitMayMay

Source: motherly

NO COMMENTS

LEAVE A REPLY

Please enter your comment!
Please enter your name here